IGEADI, I.P. Simu Sertifikadu Agradesimentu Husi Prezidente Republika Jose Ramos Horta. (Kinta-Feira, 05/02/2026) (Thursday, 05/02/2026)
DILI, 5 de Fevereiru de 2026 - Institutu Gestaun Ekipamentus no Apoiu Dezenvolvimentu Infraestrutura, Institutu Publiku (IGEADI,I.P.), simu sertifikadu agradesementu husi Prezidente Republika (PR), Jose Ramos Horta.
Sertifikadu agradesimentu ne’e Prezidente Repúblika atribui ba (IGEADI,I.P.) tamba iha tinan kotuk (2025), ekipa Brigada Sebastião Gomes, loke estrada foun husi Suku Mindelu, Postu Administrativu Turiskai, Munisipiu Manufahi ba Binani, fatin ikus Saudozu Nicolau dos Reis Lobato, hakotu is iha 31 Dezembru 1978.
Liu husi nia intervensaun Asesor prinsipal Prezidensia Republika, Jenerál Reformadu, Lere Anan Timur, hato'o agradese wain ba IGE no apresia ho esforsu ne'ebe IGEADI, I.P. halo iha fulan ida resin, hodi loke estrada foun husi Postu Administrativu Turiskai, Suku Mindelu ba Binani, hanesan fatin ikus Saudozu Nicolau dos Reis Lobato hakotu is ba.
Iha Tinan kotuk Prezidente Republika, hakarak komemora loron FALINTIL 20 de Agustus ba dala (50), iha Binani, maibe ba iha ne'eba la-fasil tamba laos tetuk, alternativa ida mak Prezidente ba ho Helikoptru, maibe hau husu sira dehan Helikoptru bele tun kalae.? sira hatan dehan Helikoptru mos tun ladiak tamba fatin klot. ita nia hanoin atu sae kareta too iha Mindelu mak lao deit to'o Binani, maibe sira dehan lao dok, tanba ne’e hau kontaktu Xefe Casa Sivil no ekipa liña Ministerial, atu halo oinsa para bele loke estrada tama too Binani, " tenik Asesor prinsipal Prezidensia Republika Jenerál Reformadu Lere Anan Timur, iha salaun enkontru Prezidente Republika Bairo-Pite Dili, Kinta-Feira (05/02/2026).
Jenerál Reformadu nee akresenta, agradesementu nee laos ita hasoru malu mak ita fo agradese ba malu, maibe obra no asaun neebe ita halo diak, nee mak forma de agradesimentu.
Iha fatin hanesan Xefe Casa Sivil, Prezidensia Republika, Jesuína Maria Ferreira Gomes, hateten, nia lori Prezidente Republika, nia naran hato'o agradese wain ba entidade hotu, Prezidente laiha buat murak ida atu agradese no rekoñe entidade hotu ne'ebe servisu maka’as iha Binani, maibe liu husi sertifikadu de agradesimentu.
" Prezidente apresia tebe-tebes ita boot sira nia preparasaun no kolaborasaun, servisu hamutuk ne laos too iha nee deit, sei iha servisu barak neebe sei presija ita boot sira nia apoiu, liu-liu durante mandatu Prezidente Republika nian, liu husi ita boot sira nia disponibilidadeita boot sira nia laran luak atu servisu hamutuk nafatin ho Prezidensia kuandu ami solisita ita boot sira nia apoiu, dala ida tan agradese ba ita boot sira nia servisu diak hotu" dehan Xefe Casa Sivil, Prezidensia Republika, Jesuína Maria Ferreira Gomes.
Nia hatutan Prezidente koalia ona ho Primeiru Ministru, para halo programa hodi hadia fatin Binani sai fatin turismu, tanba nee husu nafatin hein, kuandu desizaun iha ona, Prezidensia nafatin husu ita boot sira nia apoiu.
Entertantu Prezidente IGEADI,I.P, Dra. Ana Paula, hateten, se Prezidensia Republika iha hanoin atu hadia fatin, Binani iha Suku Mindelu, IGEADI,I.P, prontu iha kualker tempu hodi apoiu, para rezolve.
Aktividade saida deit mak Prezidente Repúblika halo IGE prontu iha kualker tempu para apoiu hodi rezolve, laos iha fatin nee deit, maibe iha fatin neebe povu presiza IGE nia tulun, ami prontu para apoiu, ita hare agora dadaun tempu udan ami koloka ona ami nia maki iha Brigada sira, IGE iha Brigada lima neebe prontu atu apoiu servisu emergensia sira, agora ami nia apoiu makas liu mak iha Munisípiu Likisa, Postu Administrativu Maubara no Postu Administrativu Loes Suku Guiço, atu prevene mota sobu komunidade nia uma no toos," dehan Prezidente IGEADI, I.P. Dra, Ana Paula da Cruz.
#MEDIA_IGEADI, I.P.