Reprezentante husi Dili Institute of Technology (DIT) ho nia estudante sira hasoru malu ho Presidente IGEADI, I.P. iha Gabineti Presidente Nian. (KINTA-FEIRA,19/02/2026). (THURSDAY,19/02/2026).
DILI, 19 de Fevereiru de 2026 - Reprezentante Dili Institute of Technology (DIT), koordenador Offisina, Departamentu Enginharia Mekánika, Mateus de Sousa M.Phil, husu agradese ba Institutu Jestaun Ekipamentus no Apoiu Dezenvolvimentu Infraestrutura, Institutu Públiku (IGEADI, I.P.), tamba simu ona estudante Departamentu Enginharia Mekánika nain tolu, hodi halo estagiu profesional durante fulan tolu.
" DIT nomos Departamentu Mekanika agradese tebes ba IGEADI, tamba durante fulan tolu, sira aprende buat barak ne’ebé sira la aprende iha kampus, tamba iha kampus nee teoria mak barak no sasan barak maka sira hare nia gambar deit, maibe sira mai iha terenu sira hare nia modelu maka hanesan nee duni ou balun boot liu ne'ebe sira balu hakfodak ituan, maibe buat sira nee aumenta sira koñesimentu, estudante sira durante nee ba kampus hare ba orariu mai estagiu iha IGEADI, sira hare ba oras servisu, tama dader sai loraik, nee lisaun diak ida ne'ebe sira aprende," tenik koordenador Offisina, Departamentu Enginharia Mekánika, Mateus de Sousa M. Phil.
Aproveita oportunidade nee koordenador Offisina, Mateus de Sousa M. Phil, mos husu deskulpa ba Xefi sira, karik durante estádiu professional iha IGEADI, I.P, estudante sira halo buat ruma la kona Xefi sira nia laran.
Iha fatin hanesan Prezidente IGEADI, I.P, Dra. Ana Paula da Cruz, hateten IGEADI, I.P presiza duni servisu hamutuk ho Universidade sira, liu-liu Departamentu Mekánika, hodi hili estudante mellor klasifikadu sira atu mai tuir formasaun iha IGEADI, I.P.
" Iha tinan kotuk IGEADI ho DIT ami asina ona akordu kooperasaun, tamba nee imi sira mai estagiu nee tenki seriu, tamba xefe sira iha Offisina IGEADI halo hela avaliasaun ba imi, sira sei hato'o Informasaun mai ami, ida ne'ebé mak komportamentu diak, ami sei dada hodi tuir formasaun ho padraun internasionál," dehan Prezidente, IGEADI, I.P, Dra Ana Paula da Cruz.
Lideransa IGEADI, I.P. nee akresenta kada tinan IGE husu estudante DIT nain sanulu (10), sira mai estagiu maka ekipa halo avaliasaun, sira nia komportamentu diak, IGE sei bolu hotu.
Estudante Departamentu Enginharia Mekánika DIT nain tolu, durante halao estagiu profesional iha Knua IGEADI, I.P, durante fulan tolu, hahu husi fulan Dezembru 2025 too fulan Fevereiru 2026.
#MEDIA_IGEADI,I.P.