Vogal IGEADI, I.P Entrega Sertifikadu ba Programa Formasaun no Operador Ekipamentu . Kuarta-Feira(20/12).
Dili, 20 December 2024 (IGEADI.IP) – Dili, 20 Dezembru 2024 (IGEADI.IP) - Licensing.tl entrega sertifikadu ba Formandu sira ba Programa Formasaun Sertifikasaun no Lisensiamentu ba Operadór Ekipamentu Serbisu sira ho Risku Aas.
Liu husi nia diskursu, iha loron Sexta-Feira (20/12/2024), iha Palm Business and Trade Center, Hudi-Laran Dili, Managing Director, Licensing.ti, Kay Olo Sword Gusmão hateten, aproveita biban ida ne’e atu hato'o parabens ba partisipante sira ne’ebé kompleta ona programa formasaun ba ekipamentus pezadu ho nivel altu risku.
" Ohin loron ita remata programa ida ne’e ho rezultadu ne’ebé diak tebtebes liu husi programa Estratéjiku ida ne’e, ne’ebé dezeñu ho komponente importante 3 hanesan Formasaun, Sertifikasaun no Lisensiamentu, ho programa ida ne’e ita bele hare duni benefisiu barak, hanesan aumenta kontribuisaun ba dezenvolvimentu infrastrutura husi Timoroan sira rasik. Reforsa no hasa’e Timoroan sira nia abilidade ho objetivu atu hasa’e padraun iha Timor-Leste, atu hatudu katak, timor oan sira mos bele no mos hadi'ak kualifikasaun pesoál hodi kompete iha oportunidade empregu iha Timor-Leste no mos iha ra'i li'ur," dehan Managing Director, Licensing.ti, Kay Olo Sword Gusmão
Kay Olo hatutan, partisipante sira ne’ebé ohin loron hetan sertifikadu, sira mak sai ezemplu ba traballador sira hotu iha Timor, sira mak sei lidera padraun foun ida ne’e, tamba ne’e nia husu buat ida deit ba formadu sira, implementa saida mak formadu sira aprende ona iha formasaun ba fali iha servisu fatin no nia husu atu implementa ho diak.
" Ita hotu tenki hatudu inisiativa no vontade hodi transforma situasaun moris iha Timor-Leste, konta mós ho ita-boot sira nia kontribuisaun, esforsu, tempu, no matenek hodi programa pilotu ida-ne’e sai susesu tiha ona no sei sai di'ak liu tan ba pakote sira tuir mai. Ami hatene programa ida ne’e nia susesu hanesan etapa ki’ik ida no sei dook husi ami nia objetivu ikus, maibe maske ki’ik ita hatudu Timoroan sira nia kapasidade no vontade atu kompete ho nasaun bobo’ot sira ho padraun ne’ebé a’as tebetebes maibe hatudu rezultadu diak tebes."
"Foin lalais ita nia treinador maun Chris, mai husi Australia no lidera programa ida ne’e nia dehan, maun Kay, hau bele identifika partisipante balun ne’ebé potensial atu mai servisu iha ami nia fatin iha Australia, nia dehan se imi dukur nafatin, hau sei mai hadau sira hotu, lori sira ba servisu iha Australia, hau hatete ba nia dehan, labele tamba grupo ida ne’e mak sei lidera programa sira iha futuru, grupo ida ne’e mak sei loke dalan ba timoroan sira hotu, ne’ebé dala ida tan ba partisipante sira hotu, hau hato’o Parabens parabens parabens." tenik Kay Olo.
Antes remata nia diskursu, Managing Director, Licensing.ti, Kay Olo Sword Gusmão, la haluha hato’o obrigado bo’ot ba lideransa IGEADI.IP ne’ebé fó konfiansa ba Licensing.tl hodi implementa programa formasaun pilotu ida-ne’e.
Iha fatin hanesan, reprezentante Prezidente IGEADI.IP, Vogal I Almeiro C Cairo Alves, hateten nia mos hola parte iha programa ida nee liu husi LICENSING.TL no IGEADI.IP, nia parte durante ne’e asiste servisu iha terenu no rezultadu hatudu diak tebes.
" hau hato’o Parabens ba ita hotu, hau asiste ita nia servisu, feto sira hatudu katak sira mos bele halo tuir standar ne’ebé iha Timor-Leste seidauk iha, uluk hau ho kolega nain hira mos hola parte programa ne’ebé hanesan, ohin loron imi bele kontinua programa ida ne’e, hau espera katak imi bele kontinua programa ida ne’e ho diak," dehan Vogal I Almeiro C Cairo Alves.
Serimonia entrega sertifikadu partisipa husi Vogal I. Almeiro C Cairo, Vogal II. Adelina de Jesus Andrade, Director Nasional Servisu Koorporativas (DNSK), Diamantio de Carvalho, Managing Director, Licensing.tl Kay Olo Sword Gusmão no Sr. Joanico Gonçalves.
#Media_IGEADI, I.P.